現已晉身全國人大之列嘅譚惠珠，港英時代深得英方信賴，只係 30 年前一單的士醜聞同干預新聞自由無得再做「英方之珠」，從此成為政治生涯分水嶺，脫勾英國去做「中方之珠」。但究竟當年譚惠珠有幾多鮮為人知嘅勾結行為同活動呢？
90 年代初，譚惠珠在被揭發「的士醜聞」嘅前夕，一份名為 “Maria Tam” 的英國解密檔案揭示（註一），她曾計劃特意飛去英國向保守黨政要拜師學搞政黨政治。當時佢喺香港組緊叫「自由民主黨」（liberal democratic party）的新政黨（其後為香港自由民主聯會），採用中立保守路線，英方認為咁樣可以制衡由李柱銘帶頭嘅激進批評（radical critics），對港英政府來說發揮減少負面新聞嘅政治利用價值，深得當時英國外交部欣賞同鼓勵。
當時英國外交部收到譚惠珠嘅主動獻身，叫咗保守黨準備咗一日行程，帶佢參觀保守黨喺大倫敦（Greater London） 兩個選區（Kensington and Wandsworth）嘅政黨組織工作，仲去保守黨中央辦公室同黨友會面交流，最後英方仲話會示範點用當前相當先進嘅「電腦軟件」攪競選工程。同時間，其實除咗英國保守黨外，當時加拿大嘅自由黨作為姊妹黨都提供咗好多指導意見俾譚惠珠。
檔案中，見到英國外交部引述譚惠珠好開心保守黨專程為佢計劃整個行程，當時不單止同外國政要交流會面，仲喺人地身上學習點樣攪民主選舉。
如果以中方對國安法嘅標準，譚惠珠唔只係見下政要咁簡單，直情自甘做洋人扶植嘅政治棋子，仲私底下走去向英國拜師在港攪政黨政治，已經可以算係勾結境外勢力嘅具體行為同活動。如果國安法有追溯期，又應唔應該以危害國家安全第一個將佢繩之於法呢？
本來譚惠珠聯合外國勢力一路順風，但的士醜聞事件之後，英國外相韓達德（Douglas Hurd） 叫港英政府評估一下件事對譚嘅政治前途影響，而港英政府就認為譚嘅應對笨拙（Clumsily），一連串嘅風波已令佢政治事業受毀，估計譚唔太可能參與來年嘅立法會選舉，加上種種原因，最後迫使譚轉投親中。但唯獨私下勾結英國的罪證，則永遠地紀錄在檔案中。
#笨珠跳
#英方之珠變中方之珠
#勾結外國勢力
#中港檔案研究
（註一） : 1990 FCO 40 2848 Visit by Maria Tam, Chair of the Transport Advisory Committee (TAC), to the UK, August 1990_ conflict of interest
?️♀️ 支持中港檔案研究工作
本土研究社 Facebook
